Վերջերս panorama.am կայքին տված հարցազրույցում «Համերաշխություն» կուսակցության նախագահ Սարգիս Ավետիսյանը, անդրադառնալով Ռոբերտ Քոչարյանի՝ քաղաքականություն վերադառնալու մասին արված հայտարարությանը, դրական գնահատեց վերջինիս մտադրությունը:
«Ռոբերտ Քոչարյանի քաղաքականություն վերադառնալու ծրագիրը շատ դրական եմ գնահատում: ՀՀ երկրորդ նախագահը լուրջ պետական ու քաղաքական գործիչ է, և ես համարում եմ, որ նա շատ անելիքներ ունի քաղաքական դաշտում»,- ասաց «Համերաշխություն» կուսակցության նախագահ Սարգիս Ավետիսյանը:
Նա չբացառեց առաջիկա քաղաքական գործընթացներում Քոչարյանին սատարելու հավանականությունը:
«Մի շարք կուսակցություններ, այդ թվում «Համերաշխություն» կուսակցությունը, պատրաստվում են ակտիվ քաղաքականություն վերադառնալ, որի մասին կհայտարարվի առաջիկա համագումարում, և չի բացառվում, որ այդ կուսակցությունները հայտարարեն Ռոբերտ Քոչարյանին սատարելու մասին»,-ասաց Ավետիսյանը:
Թե ինչ կուսակցությունների մասին է խոսքը, նա չցանկացավ հայտնել:
Ինչ վերաբերում է ՀՀ երկրորդ նախագահին առաջադրված մեղադրանքին, ապա Սարգիս Ավետիսյանը նշեց, որ ինքը համաձայն է Ռոբերտ Քոչարյանի այն գնահատականի հետ, որ սա քաղաքական հետապնդում է, այլ ոչ թե իրավական գործընթաց:
Հիշեցնենք, որ ՀՀ երկրորդ նախագահը «Երկիր մեդիա» հեռուստաընկերության լրագրողի հարցին ի պատասխան ասել է, որ վերադարձել է մեծ քաղաքականություն: